Hay’adda Socdaalka iyo Jinsiyadda ee Jamhuuriyadda Federaalka Soomaaliya ayaa ka war heshay warar la xiriira isticmaal aan oggolaansho lahayn oo lagu sameeyay hawada iyo garoomada diyaaradaha qaranka Soomaaliya, si loo fududeeyo dhaqdhaqaaqa qof siyaasi ah oo baxsad ah.
Hay’addu, iyadoo la kaashaneysa hay’adaha kale ee qaranka ee ay khusayso, ayaa bilowday baaritaan degdeg ah si loo xaqiijiyo saxnaanta wararkaasi, loona ogaado in ay jireen wax jebin ah oo lagu sameeyay shuruucda Soomaaliya, nidaamyada la dejiyay, ama habraacyada oggolaanshaha.
Haddii la xaqiijiyo, falalkaasi waxay noqon doonaan xadgudub culus oo ka dhan ah madax-bannaanida qaranka Soomaaliya iyo xeerarka socdaalka. Fududeynta baxsadka dad la raadinayo ama fulinta hawlgallo hal-dhinac ah oo lagu sameeyo dhulka Soomaaliya iyada oo aan oggolaansho sharci ah jirin waa mid aan la aqbali karin. Ixtiraamka madax-bannaanida iyo ku dhaqanka shuruucda qaran iyo kuwa caalami ah waa mabaa’di aan laga gorgortami karin.
Dowladda Federaalka Soomaaliya waxay si cad oo joogto ah u taageertay baaqa Boqortooyada Sacuudi Carabiya ee ku aaddan wadahadal lagu qabto magaalada Riyadh, kaas oo ah geeddi-socodka siyaasadeed ee ku habboon xal u helidda xaaladda Yemen. Isku day kasta oo uu Aidarous Al-Zoubaidi ku doonayo inuu kaga baxsado geeddi-socodkan, oo ay ku jirto taageero dibadeed oo la tuhunsan yahay, wuxuu si toos ah uga hor imanayaa dadaallada diblomaasiyadeed ee socda.
Haddii baaritaanku caddeeyo wararkaasi, Dowladda Federaalka Soomaaliya waxay tilmaamaysaa in ficilladaasi sidoo kale noqon doonaan jebin heshiisyada laba-geesoodka ah ee khuseeya iyo xadgudub ku ah mabaadi’da sharciga caalamiga ah ee nidaamiya dhaqdhaqaaqa sharciga ah ee dadka.
