Taliyaha Xarunta Dhexe ee Khatam al-Anbiya, Cali Cabdullaahi, ayaa si kulul uga hadlay xiisadda sii kordheysa ee u dhexeysa Iiraan iyo Maraykanka, isagoo sheegay in haddii Washington ay sii waddo go’doominta iyo cadaadiska saaran maraakiibta Iiraan, ay taasi horseedi karto jebinta heshiiska xabbad-joogta ah. Wuxuu carrabka ku adkeeyay in tallaabo kasta oo keenta amni-darro ay yeelan doonto jawaab adag oo militari.
Cabdullaahi ayaa sidoo kale sheegay in ciidamada qalabka sida ee Iiraan aysan oggolaan doonin in wax dhoofin ama soo dejin ah ay si caadi ah uga socdaan marin-biyoodka muhiimka ah sida Gacanka Faaris, Badda Cumaan, iyo Badda Cas. Inkastoo uusan si cad u magacaabin dalalka ay saameyntaasi ku yeelan karto, haddana hadalkiisa ayaa muujinaya khatar ku wajahan isu-socodka ganacsiga caalamiga ah ee mara marin-biyoodkaas.
Dhanka kale, ciidamada Maraykanka ayaa xaqiijiyay in xannibaadda la saaray dekedaha Iiraan ay si buuxda u dhaqan gashay, iyadoo la sheegay in 24-kii saac ee ugu horreeyay aysan jirin wax maraakiib ah oo ka gudbay xayiraadda, halka qaar kalena lagu qasbay inay dib uga laabtaan. Tani waxay imaaneysaa xilli wadahadalladii u dhexeeyay labada dal ay fashilmeen, inkastoo madaxweynaha Maraykanka, Donald Trump, uu muujiyay rajo ah in wada-hadallada dib loo bilaabi karo maalmaha soo socda.
