Madaxweynaha Mareykanka Donald Trump ayaa u sheegay wargeyska The New York Post inuusan diyaar u ahayn in uu aqoonsado Somaliland, kaddib markii Israa’iil ay shalay ku dhawaaqday inay si buuxda u aqoonsatay maamulka Somaliland.
Wargeyska Times of Israel ayaa isna qoray in Trump uu sheegay inuusan raaci doonin go’aanka Israa’iil, balse uu “daraasayn doono”
Go’aanka Israa’iil ayaa si ballaaran loogu diiday fagaarayaasha caalamka, iyadoo ay ka horyimaadeen Jaamacadda Carabta, Golaha Iskaashiga Khaliijka, Midowga Afrika, Turkiga, Shiinaha iyo dalal kale.
Dowladda Federaalka Soomaaliya, oo aan iyaduna aqoonsan Israa’iil, ayaa si cad u diidday tallaabadaas, kuna tilmaantay mid lid ku ah madaxbannaanida iyo midnimada Soomaaliya.
Hadallada ka soo yeeray Trump ayaa hoos u dhigay culeyskii siyaasadeed ee ka dhashay aqoonsigii Israa’iil ee Somaliland, iyo saameyntii suurtagalka ahayd ee uu ku yeelan lahaa amniga Gobolka Geeska Afrika.
Dowladaha iyo ururrada diiday aqoonsiga ayaa ku dooday in tallaabadaasi ay ka hor imanayso qaanuunka caalamiga ah iyo xeerarka diblumaasiyadda, isla markaana ay khatar ku tahay xasilloonida gobolka.
